BETAWI TEMPO DOELOE Dodol Garang

Kalo abis lebaran seminggu entuh nyeng namanya kue lebaran masing pada bisisa,masing pada ngiasin meja kita,entuh kita ngopi atawa ngeteh masing banyak temennya.

Dulu kalo abis lebaran begini kita paling demen ama nyeng namanya uli dan dodol garang,biasanya kalo lagi minyak goreng lagi kaga gableg begitu dah kelaguan enyak kita entuh uli ama dodol nyeng udah pada buluk,dibuangin buluknya lalu dipotong -potong ditaro dah diatas nyanyaan dari genteng nyeng di jerang diatas tungku dapur. Lah kaga butuh lama entuh uli ama dodol nyeng tadinya keras kaya batu pada melene lagi.

Entuh uli ama dodol nyeng udah lembek lagi karena di garang kita makan lah jadi gurih lagi apa lagi entuh garangan dodolnya ampe rada angus pinggirannya dikit,lah nikmat bet dah berasa makan kerudan dodol di kewali nyeng angus ketika abis orang pada ngaduk.

Makan garang dodol ama uli ditemenin ama kopi sambil duduk sila dibale,makan nya sore -sore eh pas ujan gerimis entuh kodok sawah pada manting bebunyi ..set dah idup berasa indah bangat,damai dan nyaman udah gitu makan uli dan garang dodolnya sambil ngumpul ama Keluarga,wah kenikmatan nyeng kaga bisa dibeli ama apapun juga...

Sarin " Bang Ilok" Sarmadi
0200602019